යුනිකෝඩ් සිංහල-අහංගම සිංහල යට ගවුම්
Posted on February 6th, 2015

චන්ද්‍රසිරි විජයවික්‍රම

රුවන් වීරසිංහ මහතා
පරිගණක විද්‍යා දෙපාර්තමේන්තුව
කොළඹ විශ්ව විද්‍යාලය

ඔබගේ පෙබරවාරි 4 දිනැති ඊමේල් ලිපියට ස්තුතියි.

සිංහල භාෂාවේ හා සිංහල ජාතියේ අනාගත පැවැත්ම සඳහා ඉතාමත් වැදගත් සිද්ධියක්වන යුනිකෝඩ් සිංහල ගැන මා විසින් දූෂණ විරෝධී පෙරමුණට ඉදිරිපත්කල සංදේශය, සිංහල බෞද්ධයින්ට ලෝකයේ ඇති එකම වෙබ් අඩවිය වන ලංකාවෙබ් විසින් එහි පලකිරීම නිසා මෙම පිළිතුරද ඔබට මෙන්ම දහස් ගණනක් එය කියවන පාඨකයින්ටද වැටහෙනසේ සරල භාෂාවෙන් ලිවීමට මම සිතුවෙමි.

ඔබගේ ලිපියේ ඔබ, ජයන්ත අහංගම මහතාට ඒ දිනවල උදව්කලා යයි කිව්වත්, ඔබගෙන් ඔහුට කිසිම උදව්වක් නොලැබුණ බව ඔහු මට දැන්වූයේය. අඩුතරමින් අහංගම ක්‍රමය අත්‌හදාබලන (ටෙස්ට් කරන) ලෙස ඔහුකල ඉල්ලීමවත් ඔබ නොසලකා හැරියාය කියා ඔහු පවසයි.

මේ නිසා මා ඉල්ලා සිටින්නේ දැන්, අවුරුදු 8 කට පසුවවත්, ඔබ හා මොරටු විශ්ව විද්‍යාලයේ ගිහාන් ඩයස් මහතා මේ අහංගම ක්‍රමය භාවිතාකර බලා, මා විසින් මගේ සංදේශයේ අග දක්වා ඇති අහංගම ක්‍රමයේ වාසි, ඇත්තවශයෙන්ම වාසිද නැද්ද යන්න ලංකා වෙබ් අඩවිය හරහා සිංහල ජනතාවට එළිදරව් කරන ලෙසය.

මගේ සංදේශයේ කොපියක් ඔබට ලැබුණුවිට ඔබ විසින් කලයුතුව තිබුණේ එය නොවේද? ඒ වෙනුවට ඔබගත් හදිසි ක්‍රියා හා තීරණ අනිසි බව භාගෙට හෝ දැන් ඔබට වැටහීම ගැන මම සතුටුවෙමි.

මගේ සංදේශයෙන් කිසිම පුද්ගලයෙක්ව වංචාකාරයෙක් හෝ හොරෙක් කියා හඳුන්වාදී නැත. මා කියා සිටියේ ඉක්ටා නියෝජ්‍යායතනය (එහි ඉන්නේ සේවකයින් නොව කොන්ත්‍රාත් ක්‍රමයට හයර් කරන අය නිසා) යුනිකෝඩ් සිංහල සම්බන්‌ධයෙන් එහි ජාතික වගකීම හා යුතුකම හරියාකාරව ඉෂ්ටකර නැතැයි මා සිතන බවය. මේ අදහස, මීට පෙර, ඔබවැනි අයගෙන් බැටකෑ අහංගම විසින්ද ඉක්ටාවට දන්වා සිටියත් එහි නිලධාරීන්ට ඔහුට සලකා ඇත්තේ ඉතාමත් සවුත්තු අන්ද‌මටය. ඇමෙරිකාවේ සිට කොළඹ ඉක්ටා කාර්‍ය්‍යාලයටම ගියත් ඔහුට ඉක්ටා නිලධාරියෙක් හමුවීමට ඉඩක් දී නැත!

එම සිද්ධිය මෙසේය. අහංගම ඉක්ටා සභාපති හෝ ප්‍රධාන විධායක නිලධාරියා හමුවීමට පැමිණි බව කී විට ඔවුන් කන්තෝරුවේ නැතැයි ඔහුට දන්වා ඇත. වෙන කවුරුන්හෝ වත් නැද්දැයි ඇසූ විට ශ්‍රීපති නම් නිලධාරියෙක් පැමිණ අහංගමව ශ්‍රීපතිගේ කාමරයට ගෙන ගොස් ඇත. අහංගම, ශ්‍රීපතිට ඔහුගේ ක්‍රමය විස්තර කරමින් සිටිනා අතරේ ශ්‍රීපතිට ටෙලිෆෝන් කෝල් එකක් ආවේය. එයට ශ්‍රීපති දුන් උත්තරය වූයේ “යර්ස්, යර්ස් හී ඉස් ස්ටිල් හියර්” යන්නය. මින් පේන්නේ සභාපතිට හෝ ප්‍ර වි නිලධාරියාට අහංගමට මුහුණ නොදි සැඟවීම අතේම පත්තුවීමක් නොවේද?

මා විසින් මෙම යුනිකෝඩ් සිංහල ප්‍රශ්නය දූවිපෙ ට ඉදිරිපත් කලේ මේ පසුබිම යටතේ ය. දූවිපෙ මගින් ඉක්ටා නමැති බීරි අලියාට වීනා ගායනය කල හැකිය කියා මම සිතුවෙමි. සංදේශය මුල සිට අගට සාවධානයෙන් කියවන කෙනෙකුට වංචාකාරයින්, හොරුන් ගැන නොව (ඩොලර් හා රුපියල්) කෝටි 83 ක් වියදම් කර සිංහල ජාතියට කරදී  ඇති සේවය කුමක්ද යන ප්‍රශ්නය මතුවේ. ලංකාවේ අගනුවර රජ රටට ගෙනයාම, පලාත් නවය වෙනුවට ලංකාව ගංඟා නිම්න හතකට රට බෙදීම, ඉකොලොජිකල් මායිම් අනුව සැදූ ජන සභා ඇතිකර 13 වන සංශොධනය අහෝසි කිරීම, යනාදී මතෘකා යටතේ මිනිසුන්ගේ ඇස් ඇරවීමට ක්‍රියා කරමින් සිටිනා මට මේ යුනිකෝඩ් සිංහල ප්‍රශ්නය තවත් එක ජාතික මතෘකාවක් මිස ඔබ වැනි අයට මඩ ගැසීමේ ටොපික් එකක් නොවේ. මෙය ජාතික ප්‍රශ්නයක් මිස දේශපාලකයින්ගේ හොර වැඩ ගැන දැන් පවතින උණුසුමේ කොටසක් නොවේ.

ඔබලා, ඔබලාගේ සාමූහික ජාතික වගකීම පැහැර හැර ඇතැයි හෝ ඒ වගකීම හරියාකාරයට ඉෂ්ටකර නැතැයි කීම ඔබලාගෙන් කෙනෙකුට වංචනිකයෙක් හොරෙක් කියනවාට වඩා වෙනස් ය. මිය ගිය සමරනායක මහතා, ඈපා සිංහ මහතා හා හිටපු ජනාධිපති ලේකම් ලලිත් වීරතුංග වැනි අය මිස ඔබ ඉක්ටාවට සම්බන්‌ධ බව මා දැනගත්තේ ඔබගේ ලිපියෙන් පසුවය. මා දන්නා එකම දූෂමාණ ආරංචිය නම් ඉක්ටා ලොක්කෙකුගේ බෑණා (දුවගේ සැමියා) කොළඹ මයික්‍රෝසොෆ්ට් කන්තෝරුවේ රක්‍ෂාව කරණවා කියන කතාව පමණය. යුනිකෝඩ් ඇමෙරිකන් සමාගමේ ලොකුම බලවතා මයික්‍රෝසොෆ්ට් කොම්පැනිය නිසා, යුනිකෝඩ් සිංහල නිසා ලංකාවේ බිස්නස් ජයවී ඇති එවැනි කොම්පැනියක ඉක්ටා ලොක්කෙකුගේ බෑණා රක්‍ෂාවක් කරනවා නම් එය හරිද කියා සිතා බලන්න. එය හරියට කාඩිනල්ගේ සහෝදරයාගේ දුවට අනිසි ලෙස ඉතාලි ලංකා තානාපති කාර්‍ය්‍යාලයේ තනතුරක් දුන්නාවගේ නොවේද?

යුනිකෝඩ් සිංහල ක්‍රමයේ දෝෂ මා පෙන්වා දී නැත. මා කලේ අහංගම ක්‍රමයේ වාසි පෙන්වා දීමය. තායිලන්තය කලා මෙන් සින්ගල් බයිට් ගන්නවා වෙනුවට සුදු විදේශිකයින් දුන් ඩබල් බයිට් බදාගැනීමෙන් ඔබලා යුනිකෝඩ් සිංහල, ඩිජිටල් හයිවේ එකේ නොන්ඩියෙක් කර ඇතැයිකීම, යුනිකෝඩ් සිංහලවල දෝෂයක් පෙන්වා දීමක් නොව ඔබලා තෝරාගත් යුනිකෝඩ් පාර, නිවැරදි පාර නොවන බව පෙන්වා දීමකි. එය ලංකාව ඒකීය කරනවාද, පෙඩරල් කරනවාද වගේ පැරඩයිම් තෝරාගැනීම පිළිඹද ප්‍රශ්නයකි.

මෙහිදී තවත් සඳහන් කලයුතු කරුණක්නම් අහංගම විසින්ම සදා ඇති තවත් ක්‍රමයක් මගින් මා කලක සිටම යුනිකෝඩ් සිංහලද භාවිතාකරන බවය. උදාහරණයක් වශයෙන් මා මේ ලිපිය අහංගම ක්‍රමයට ලියුවත් එය ඔබට එවන්නේ එය යුනිකෝඩ් සිංහල වලට පෙරලාය. එසේ නැත්නම්, ඔබගේ පරිගණකයේ ඔහුගේ අරුණ ෆොන්ට් එක නැති නිසා ඔබට එය ඊමේල් මගින් ලැබෙන්නේ ඉංග්‍රීසි (ලැටින්) අකුරුවලින් වන නිසාය. ඇ, ත, ද යන ශබ්ද වෙනුවට ආදි ඉංග්‍රීසි භාෂාවේ අකුරු තුනක් ආදේශකර ඇති බව මතක තබා ගත්‌විට, මීට පෙර මගේ සංදේශයේද කියා ඇති ආකාරයට ඔබට එය ශබ්දය අනුව සිංහලෙන් කියවීමට හැකිය.

මා විසින් අහංගම ක්‍රමයේ වාසියක් ලෙස පෙන්වා දුන් ක්වාර්ටි (අප දකින ඉංග්‍රිසි කී බොඩ් එකට කියන නම, මෙය එහි ඇති මුල් අකුරු හයය) කී බෝඩ්  එකම ඒ මගින් සිංහල ශබ්ද සඳහා යොදා ගැනීම (ඒ අකුර අ ශබ්දයට, එම් අකුර ම ශබ්දයට…) ඔබ විසින්ද වක්‍රව  අනුමත කර ඇතිබව පේන්නේ ඔබටද විජේසේකර කී බෝඩ් එක අමාරුබව ඔබ කියන නිසාය.  මට සිංහල යුනිකෝඩ් එපා වුනේ එය පාවිච්චි කිරීමට නම් ප්‍රථමයෙන් මට විජේසේකර කී බෝඩ් එක දැනගතයුතු වීමය.

අවුරුදු 50 කට පමණ කලින් සැදූ විජේසේකර ක්‍රමය වත්මන් ඩිජිටල් යුගයට නොගැලපේ. උදාහරණයක් වශයෙන් අ යන්න සඳහා ඔහු යොදාගන්නේ ඉංග්‍රීසි කී බෝඩ් එකේ ඩබ්ලිව් අකුරය. නමුත් අහංගම ක්‍රමය යටතේ ඇ, ත, ද යන ශබ්ද තුන හැරුණුවිට අනිත් සිංහල ශබ්ද සඳහා යොදාගෙන ඇත්තේ ඉංග්‍රිසි කී බෝඩ් එකේ අකුරු ශබ්දයම නිසා අවුරුදු දහයේ දොළහේ ළමයින් පවා එය දක්‍ෂලෙස හසුරුවයි.

මේ නිසා අප විසින් රට-ජාතිය-භාෂාව වෙනුවෙන් කලයුතුයයි මා සිතන්නේ, ප්‍රථමයෙන් ඔබ විසින් හා ගිහාන් ඩයස් මහතා වැනි අයෙක් විසින් මෙම අහංගම ක්‍රමය අත්‌හදා (ටෙස්ටින්) බැලීමය. ඉන්පසුව මා විසින් මගේ සංදේශයේ දක්වා ඇති අහංගම ක්‍රමයේ වාසි ගැන අපට සාකච්චාකල හැකිය.

ගවුම් හා යටගවුම්
පරිගණක තිරයේ දිස්වන යුනිකෝඩ් සිංහල අකුරු ගවුමක් නම්, එහි පසුබිමේ තිබෙන්නේ ඉලක්කන් ය. අහංගම ක්‍රමය අනුව තිරයේ දිස්වන සිංහල අකුරුවලට (ගවුම) අමතරව එහි පසුබිමේ තිබෙන්නේ සිංහල ඉංග්‍රිසියෙන් ලියු යටගවුමය. අහංගම ක්‍රමයේ ඉලක්කන් තිබෙන්නේ මේ යටගවුමට යටින් ය. සිංගල් බයිට් ක්‍රමය යොදා ගනිමින්, තායිලන්තය හා යුරෝපීය භාෂා 14 කලා මෙන් අහංගම අපට ගවුමක් හා අවශ්‍යනම් යටගවුමක්ද ලබාදී ඇත. යුනිකෝඩ් සිංහලමෙන් නොව මේ යටගවුම නිසා ඩිජිටල් හයිවේ එකේදී අපේ හෙළුව වැසී තිබේ. මේ බව ඔබට පෙන්වා දීමට මෙම ලිපිය ඉංග්‍රීසි අකුරෙන්ද (යටගවුමෙන්) මෙහි පහතින් කොපිකර ඇත.
අහංගම ක්‍රමය අත්‌හදාබැලීමට අවශ්‍ය විස්තර පහත ලින්ක් එකෙන් ලබා ගන්න. 

ahangama.com -> Click button called “smartfont and keyboard layout”

චන්ද්‍රසිරි විජයවික්‍රම
පෙබරවාරි 6, 2015

Leave a Reply

You must be logged in to post a comment.

 

 


Copyright © 2018 LankaWeb.com. All Rights Reserved. Powered by Wordpress