ජෝන් කෙරී අවුරුද්දට සුබ පතයි
Posted on April 13th, 2015

නලින් ද සිල්වා

ඇමරිකන් රාජ්‍ය ලේකම් (විදේශ ඇමති) අපට හෙට ලබන අලුත් අවුරුද්්දට සුබ පතා ඇති බව ජාතික රුපවාහිනිය වාර්තා කළේ ය. ඇතැමුන් අසන ආකාරයට කාට ද ආඩම්බරේ යනුවෙන් අප ඇසිය යුතු ද? එසේත් නැත්නම් අප හැඬිය යුතු ද? මේ සුළුවෙන් තැකිය යුතු සුබ පැතුමක් නො වේ. අප හඳුනන අයකු අපට අවුරුද්දට සුබ පැතූ විට අපි ඔබටත් එසේ ම වේවා යැයි කියමු. අප ජාතියක් ලෙස කෙරීටත් එසේ ම වේවා යැයි කියමු ද? එහෙත් ප්‍රශ්නයක් වේ. ජෝන් කෙරීටවත් ඇමරිකාවටවත් හෙට ලබන අවුරුද්දක් නැත. කෙසේ වෙතත් කෙරී ගෞරව කරන්නේ මෛත්‍රිපාලට ය. 

අප ජීවත්වන යුගයේ මෛත්‍රිපාල සිරිසේනට ලැබෙන්නේ එසේ මෙසේ ගෞරවයක් නො වේ. එංගලන්තයේ රැජින වූ එලිසබෙත් වින්ඩ්සර් ඔහුට අත්වැසුම් ගලවා අතට අත දෙයි. එංගලන්තයේ අගමැති ඩේවිඩ් කැමරන් මෛත්‍රිපාලගේ මෝටර් රථය ළඟට දුව ඇවිත් අතට අත දෙයි. කැමරන් මෝටර රථයේ දොර ඇරියේ ද යන්න මට මතක නැත. ඉන්දියාවේ දී හා පකිස්ථානයේ දී සිරිසේනට ලැබෙන්නේ ඉහළ ම ගෞරව ය. මෛත්‍රිපාලට මෙතරම් ගෞරව ලැබෙන්නේ මේ දින අනූවෙහි ඔහු කුමක් කළාට ද? සිරිමාවෝ බණ්ඩාරනායක මැතිණියටවත් මෙතරම් ගෞරවයක් ජාත්‍යන්තර වශයෙන් ලැබී නැත. එහෙත් චන්ද්‍රිකාගෙන් ඇසුවහොත් ඇය කියනු ඇත්තේ යුද්ධයෙන් සියයට හැත්තෑපහක් නිම කළ ඇයට ලැබුණු ගෞරව අප නොදන්නා බව ය, එසේත් නැත්නම් වසන්තරාජා තමන්ගේ නිහතමානි ඉල්ලීමක ප්‍රතිඵලයක් ලෙස ඒ ප්‍රචාරය නොකළ බව ය. 

මෛත්‍රිපාලට ලැබෙන සියලු ගෞරව ජාතියට ලැබෙන ගෞරව විය යුතු ය. පහේ ශිෂ්‍යත්වයෙන් ඉහළින් ම සමත්වන ශිෂ්‍යයන් ද කියන්නේ ගෞරවය තමන්ට නොව දෙමවුපියන්ට, පාසලට හා මිතුරන්ට ලැබිය යුතු බව ය. එබැවින් මෛත්‍රිපාලට ලැබෙන ගෞරව ගැන කියනුම කවරේ ද? එහෙත් ප්‍රශ්නයක් වෙයි. පහේ ශිෂ්‍යත්වයේ හපනුන් අඩුම තරමෙන් විභාගයකින් ඉහළ ලකුණු ලබා ඇත. එහෙත් මෛත්‍රිපාල කර ඇත්තේ කුමක් ද? පහේ පංතිවල නිවට ම ශිෂ්‍යයන්ට තෑගි දෙන ක්‍රමයක් අධ්‍යාපන අමාත්‍යාංශය විසින් සකස්කරනු නොලැබීම මෛත්‍රිපාලට කරන අසාධාරණයකි. 

ජෝන් කෙරී යනු එසේ මෙසේ පුද්ගලයකු නො වේ. ඒ බව මෙරට විදේශ ඇමති මංගල සමරවීර දන්නා බවට සැකයක් නැත. සමරවීර හා කෙරී එකට සිටින ඡායාරුපවල මංගලගේ කුඩා බව අපි දුටුවෙමු. මංගල සමරවීර මගින් අපට කෙරීගෙන් දැනගත යුතු කරුණු නම් පසුගිය වසරවල ඇමරිකන් රාජ්‍ය ලේකම් අපේ නව වසරට අපට සුබ නොපැතුවේ ඇයි ද යන්නත් ඔහු (මංගල නොව කෙරී) ජාතික වශයෙන් වැදගත් අවස්ථාවල ලංකාව හැරෙන්නට සුබ පතන වෙනත් රටවල් තිබේ ද යන්නත් ය. ඒ අතර අප දැනගත යුතු තවත් කරුණු දෙකක් වෙයි. ළඟ එන වෙසක් දිනයේ කෙරී සිල් සමාදන් වීමට බලාපොරොත්තුවක් ඇත් නම් ඒ සඳහා නාග විහාරයට (යාපනයේ බැරි නම් කෝට්ටේ) පැමිණෙන්නේ ද යන්නත් මංගල සමරවිර ජනේරුවට ඇමරිකාවට සුබ පැතිය යුතු ද යන්නත් ය. 

අවුරුද්දට සිරිතක් වශයෙන් මෙරට ජනාධිපති, අගමැති, විපක්‍ෂ නායක ආදීහු ඔවුන්ගේ නිල තත්ත්වය කෙසේ වුවත් රටට ජාතියට සුබ පතති. ජෝන් කෙරී මෙරට උසුලන නිලය කුමක් ද? කෙරී අපට ගෞරව කරන්නේ මෛත්‍රිපාල වැදගත් සේවයක් දින අනූවක් වැනි කෙටි කාලයක දී කර ඇති බැවිනි. මෛත්‍රිපාල සාම්පුර් නාවික හමුදා කඳවුර ගළවා දමා ඇත. පළාලේ කඳවුරේ අධි ආරක්‍ෂිත කලාපයේ වැදගත් ඉඩම් විග්නේස්වරන්ගේ ඉල්ලීම පරිදි අත්හැර දමා ඇත. බෞද්ධ ප්‍රතිපත්ති අනුව අත්හැරීම හොඳ ක්‍රියාවක් බව කෙරීට රතන හිමියන් සමහර විට මේ වන විටත් කියා දී තිබෙන්නට හැකි ය. රටේ ආරක්‍ෂාව ගැන කතා කරන ඇමතියකු නැත. ඒ වෙනුවට රවි කරුණානායක ආරක්‍ෂක මධ්‍යස්ථානයේ ඉදිකිරීම් නවතා ඇත. සිරිසේනගේ ජනාධිපතිවරණ ප්‍රකාශයෙහි රටේ ආරක්‍ෂාව ගැන වචනයක්වත් සඳහන් නො විණි. 

අද මෙරට නිල වශයෙන් නොවූවත් ඇමරිකාවේ එංගලන්්තයේ හා ඉන්දියාවේ යටත්විජිතයකි. අප ක්‍රියාත්මක කරන්නේ මූලික වශයෙන් ඔවුන්ගේ න්‍යාය පත්‍ර ය. සිරිසේනට බටහිරයන් බොහෝ දේ කියා දී ඇත. ඒ කියා දීම අරඹා නම් දින සියයට වැඩි ය. බටහිර රටවල් හා ඉන්දියාව තම නියෝජිතයාට සැළකීම පුදුමයක් නො වේ. කෙරී අපට සුබ පතන්නේ තමා මෙරට වක්‍ර පාලකයකු බව දන්නා බැවිනි. 

නලින් ද සිල්වා

2015 අප්‍රේල් 13 

2 Responses to “ජෝන් කෙරී අවුරුද්දට සුබ පතයි”

  1. Christie Says:

    Namaste:
    “අද මෙරට නිල වශයෙන් නොවූවත් ඇමරිකාවේ එංගලන්්තයේ හා ඉන්දියාවේ යටත්විජිතයකි”. Thank you, at last you have included India last. The time I spoke to you once a few years ago I explained to You about the Indian Empire and what it is doing to the Island and other Indian colonies. Kerry is just another victim of the Indian vermin in the US. Indian Vermin Lobby has overtaken the Jewish Lobby of the US and UK in financing and block vote. Jai Hind

  2. Kumari Says:

    Dear Professor,

    Can you please enlighten us as to what the Constitution says, in case the President becomes too ill to carry out his duties? You have a better grasp on the Clauses of the Constitution.

Leave a Reply

You must be logged in to post a comment.

 

 


Copyright © 2018 LankaWeb.com. All Rights Reserved. Powered by Wordpress