ඉන්ද්‍රනාම
Posted on November 25th, 2015

වෛද් රුවන් එම් ජයතුංග 

ඉන්ද්‍රනාම

වස්සෙක් ද නුඹ

තණකොළ බුදින​

තිබුනේ නැතුවද නුඹටත්

විචාර බුද්ධියක්  මොලයක්

 

රැවටී නුඹ කපටීන්ට

පුද කලයි නුඹේ අධ්‍යාපනය

සහ තරුණ ජීවිතය මනරම්

කිසිදින  යළිත් නොඑන

 

නායකයන් කීව පලියට

කිසිදා නොදැන සිටි මිනිසුන්ට

කොකා ගැස්සූ නුඹ

දහම් පාසල් ගිය කාලයේ

වතුරේ ගිය කූඹියාත්

බේරගත්තා නේද

 

කියූ සැනින් බස් පුච්චා

ට්‍රාන්ස්ෆෝමර විනාශ කළ නුඹ

ජීවිතයේ කවදාහෝ දෙයක්

නිර්මාණය කලේ කවදාද

 

නුඹලාට පන්ති කළවුන්ම​

බිල්ලන්වී හන්දි වල

නුඹලාගේ බෙල්ලෙන්ම

අල්ලගෙන යන්නට

හිස වැනූ අයුරු මතකද

 

වදකාගාරවල

ධර්ම චක්‍රයෙන්

ඉර්සි පොසිසන් එකෙන්

තැබූ කල නුඹලාව

 

බැටන් පොල්ලෙන්

එස්ලෝන් බට වලින්

මහත වයර් සහ​

රත්වූ යකඩ කූරු වලින්

 

සත්‍ය මතු කර ගන්නා

නිල අැඳුම් ඇඳි නග්න

වෘකයන් වෙත ආහර පිණිස​

නුඹලා විසි කළ නායකයන්

කොහේද අද

 

සමහරු සැප විඳියි සීත රටවල

නුඹලා නරකාදියේ පැසෙන විට

සමහරු ධනපති පන්තියේ

ඔඩොක්කු කුක්කන්‍ ​ ය​

තවත් අය මුදල් සොයයි අත යට

උපන් දිනය​ත් වෙනස් කරගෙන

 

බිලිබෝයි කෙනෙක් වී

එලොව ගොස් මෙලොව ආ

යන්තම් රැක ගත්තයි

පණ කෙන්ද​ නුඹ

පෙර පිණක​ට

 

එදා වීරයෙකුවූ ඉන්ද්‍රනාම

අද නුඹ ද්‍රෝහියෙකි

වීරයන් හා ද්‍රෝහීන්

නිර්ණය කරනා

රේඛාව නුඹ දුටුවේද

 

මනුස්සකමක් රහිත​

දේශපාලනයක් වෙනුවෙන්

දිවි දෙවැනි කොට වැඩ කෙරූ

නුඹලා වගේ මිනිස් ප‍්‍රාණීන් සමූහයකගේ

අවතැන්වූ ජීවිත කතාව

සෑම වසර දහ පහළහකට වරක්

මේ ගෙන්දගම් පොළවේ

සිදුවෙනවා නේද

නොනැවතී කැරකෙන

චක්‍රයක් ලෙස​ට

Leave a Reply

You must be logged in to post a comment.

 

 


Copyright © 2024 LankaWeb.com. All Rights Reserved. Powered by Wordpress