මව් මරා උපන් කුමරා
Posted on March 22nd, 2016

වෛද් රුවන් එම් ජයතුංග 

දරු ප්‍රසූතියෙන් පසු අධික ලේ වහනය වන කාන්තාවක් වාට්ටුවට ඇතුලත් කොට ඇති බව සවස් වරුවක නේවාසික වෛද්‍ය නිලධාරී එෆ් එම් මෙන්ඩිස් මට දැණුම් දුන්නේය​. මම වහාම  වාට්ටුවට ගියෙමි. රෝගියා එවා තිබුනේ දංකොටුව රෝහලෙනි. දරු ප්‍රසූතියෙන් පසු වැදෑමහ ඝර්භාශය  තුල සිරවී තිබේ. එය අත දමා ගැනීමට කරන ලද වෑයමේදී දංකොටුව රෝහලේ වෛද්‍යවරයා අතින් ඝර්භාශය කනපිට හැරී අධික රුධිර වහනය වන්නට පටන් ගෙන ඇත​. 

කාන්තාව මලානිකය​. ඝර්භාශයෙන් තවමත් රුධිරය ගලයි. වහාම මේ කාන්තාවට රුධිර පාරවිළනය කල යුතු බව නේවාසික වෛද්‍ය රාම් මනෝහර්ට පවසා ඔහුව ලේ බැංකුවට පිටත් කලෙමි. ඒ අතරවාරයේදී නාරි හා ප්‍රසව විශේෂඥ වෛද්‍යවරයාට තත්වය දැනුම් දුන්නෙමි. ලේ වහනය නැවැත්වීම සඳහා ඝර්භාශය ඉවත් කරන ශල්‍යකර්මය (Hysterectomy ) කල යුතු බව අපට වැටහුණි. එම නිසා රෝගියා ශල්‍යාගාරයට ගෙන ගියෙමු. ඝර්භාශය ඉවත් කලද රුධිර වහනය සිදු විය​. එයට හේතුව රුධිර කැටි ගැසීමේ ක්‍රියාවලිය බිඳ වැටී Disseminated intravascular coagulation (DIC) නම් තත්වය මතු වීමයි. 

මෙම කාන්තාවට අප නොකඩවා රුධිරය දුන්නෙමු. ඇයට රුධිර පයින්ට් විශාල ප්‍රමානයක් දී අවට රෝහල් වලින් ද ලේ ඉල්ලා ගිලන් රථය යැව්වෙමු. එහෙත් ඇයගේ තත්වය ක්‍රමක් ක්‍රමයෙන් අසාධ්‍ය වූවාය​. සිහිය නොමැතිව සිටි ඇය උදෑසන හතර පමණ වන විට මිය ගියාය​. 

මෙම කාන්තාවගේ මරණයෙන් පසු ඇයගේ ස්වාමි පුරුෂයා තම බිරිඳ ප්‍රසූත කල බිළිඳා ගෙන යාමට අාවේ වයස අවුරුදු පහක් පමණ වන පුතු සමගය​. ඔහු සරමක් ඇඳි වයස තිස් පහක පමණ පුද්ගලයෙකි. අම්මාගේ මරණය ආරංචි වී දෝ කුඩා පුතු ශෝකයෙන් බිම බලාගෙන සිටියේය​. පුරුෂයා බිළිඳාව වඩා ගත්තේය​. ඉන්පසු ඔහු වාට්ටුවෙන් යන්නට ගියේය​. අළුත උපන් මල්ලී තාත්තා වඩා ගෙන යද්දී කුඩා පුතු ඔවුන් පසු පසින් ගියේය​. මෙම දුක්මුසු දර්ශනය දුටු වාට්ටුවේ හෙදියක වූ ගුණපාල මිස් කඳුළු සැලුවාය​. 

මව් මරා උපන් කුමරා මේ වන විට වසර දහ අටක පමණ තරුණයෙකු විය හැකිය​. තම මව පිළිබඳ මතකයක් ඔහුට නැති වූවද මවගේ සුවඳ ඔහුට ඉඳහිට දැනෙනවා විය හැක​. 

2 Responses to “මව් මරා උපන් කුමරා”

  1. Dham Says:

    This is not මව් මරා උපන් කුමරා but possibly a killing by an incompetent doctor due to negligence. It takes time to transport to Negombo form Dankotuwa and he may have wasted time not knowing what to do.
    This certainly requires an inquiry but another poor Appuhamy , helpless.
    I wish them well to get over suffering.

  2. cwije Says:

    The title of the story should have been how a doctor killed a poor woman. Still we must thank Ruwan for his stories which informs people of the medical crowds inner society.

Leave a Reply

You must be logged in to post a comment.

 

 


Copyright © 2018 LankaWeb.com. All Rights Reserved. Powered by Wordpress