මිනිසුන්ගේ සමානකම ඇත්තේ කොහේ ද?
Posted on March 31st, 2016

නලින් ද සිල්වා

මිනිස්කම යන්න අගය කළ යුත්තකි. ඒ පිළිබඳ වාදයක් තිබිය නො හැකි ය. නීතිය ඉදිරියේ මිනිසුන් සමාන වේ යැයි කියැවෙයි. එය ද වටිනා අදහසකි. එහෙත් අවාසනාවකට මිනිස්සු සමාන නො වෙති. එක් එක් අයගේ දක්‍ෂතා විවිධ ය. ඇතැමුනට දක්‍ෂතා ඇති බවක්වත් අපි නො දනිමු. ඒ එවැනි දක්‍ෂතා සමාජය විසින් පිළිගෙන නොතිබීම නිසා ය. සමාජය විසින් පිළිගැනෙන්නේ සමාජයට අවශ්‍ය දක්‍ෂතා පමණකි. ඒ දක්‍ෂතා තීරණය කෙරෙන්නේ කවුරුන් විසින් ද? අපට ලංකාවට වුවමනා අන්දමට දක්‍ෂතා තීරණය කිරීමට හැකි ද? ලංකාවට වුවමනා යන්නෙහි ම තේරුම කුමක් ද? එමෙන් ම වටිනා අදහසක් යන්නෙහි වටිනාකම යනු කුමක් ද?

මේ පිළිබඳ දාර්ශනික සාකච්ඡාවක් කිරීම මගේ අරමුණ නො වේ. ඒ සඳහා මට ඇති සුදුසුකම කුමක් දැයි කිසිවකු විසින් ප්‍රශ්න කෙරීමට ද ඉඩ ඇත. අද සුදුසුකම් මනින්නේ සහතිකවලිනි. මට දර්ශනය පිළිබඳ උපාධියක් නැත. මා කිසිම විභාගයකට දර්ශනය විෂයයක් ලෙස හදාරා නැත. එහෙත් මා දන්නා කරුණක් වෙයි. මිනිසුන් සමාන නැත. අඩුම තරමෙන් නීතිය ඉදිරියේවත් සමාන නැත. මා කතාකරන්නේ චම්පික රණවකගේ රිය පැදවීමක් ගැන නො වේ. පොලීසියට අනුව ඔහු සිල් බිඳගත්තේ යැයි කියන රාතී්‍රයක රිය පදවා නැත.  රිය පදවා ගෙන ගියේ චම්පික යැයි කීමට සාක්‍ෂි නැත. සාක්‍ෂි යනු කවරේ ද? යමක් යමක සාක්‍ෂියක් බව තීරණය කරන්නේ කවු ද? ඒ කුමක් වුවත් නීතිය ඉදිරියේ ඇමතිවරයකු සහ වැසියකු අතර සමාන කමක් නැත.  

අවුරුදු විසිපහකට පමණ පෙර කොළඹ විශ්වවිද්‍යාලයෙන් මා පහකෙරිණි. එකල එහි උපකුලපති වූයේ ජී එල් පිරිස් ය. ඔහු එදා එ ජා ප හිතවතෙකි. අද සංධානයේ බලවතෙකි. එකල ගණිත අංශයෙහි ප්‍රධානියා වූයේ පී ඩබ් ඈපාසිංහ නමැත්තෙකි. අද ඔහු මහින්ද රාජපක්‍ෂගේ හිතවතෙකි. එදත් හිතවතකු වන්නට ඇත. කෙසේ වෙතත් මට විරුද්ධව චෝදනා අටක් විය. ඒ චෝදනා ඔප්පු කිරීමට සාක්‍ෂි ද මෙහෙයවිණි. සාක්‍ෂි මෙහෙයවුණේ වී කේ සමරනායක නම් මහාචාර්යවරයකු විසිනි. ගෘහස්ත පරීක්‍ෂණයෙහි දී චෝදනා ඔප්පු විය. මා සේවයෙන් පහකෙරිණි. මම කම්කරු උසාවියේ නඩුවක් පැවරීමි. ඒ නඩුවෙන් මට ගෙවීමක් කරන මෙන් කොළඹ විශ්වවිද්‍යාලයට නියම කෙරිණි. කොළඹ විශ්වවිද්‍යාලයෙන් ඒ තීන්දුවට විරුද්ධව මහාධිකරණයට අභියාචනයක් ඉදිරිපත් කෙරිණි. මහාධිකරණයට අනුව මා වැරදිකරු විය. කොළඹ විශ්වවිද්‍යාලයෙන් ගෙවීමට තිබූ මුදල අවලංගු කෙරිණි. මම ශ්‍රෙෂ්ඨාධිකරණයට අභියාචනයක් ඉදිරිපත් කෙළෙමි. කම්කරු උසාවියෙන් මට ගෙවීමට නියම කළ මුදලෙන් තුනෙන් දෙකක් පමණ හෙවත් ලක්‍ෂ පහක් ගෙවීමට ශ්‍රෙෂ්ඨාධිකරණයෙන් නියම විය. ඒ ඒ උසාවිවලින් ඒ ඒ තීරණ ලැබුණේ කෙසේ ද? කෙසේ වෙතත් අවුරුදු දහයක් සේවයෙන් පහකරනු ලැබ සිටීමෙන් මට රුපියල් ලක්‍ෂ පනහකට වැඩි අලාභයක් සිදුවිය. වෙනත් දරුවන් වෙනුවෙන් මගේ දරුවෝ ඒ අලාභයට යටත්වූහ. මගේ දරුවනට ඒ ගැන අභිමානයක් ඇතැයි සිතමි. අලාභය ලක්‍ෂ පහක ගෙවීමකට පමණක් යටත්වූයේ කෙෙසේ ද? ඒ සියල්ලට ම වඩා මා වැරදිකරුවකු ද නැද්ද යන්න තීරණය කරන්නේ කෙසේ ද?

මේ සියල්ල සාපේක්‍ෂ ය. චෝදනා ද නඩු තීන්දු ද සාපේක්‍ෂ ය. නීතිය ද සාපේක්‍ෂ ය. මගේ ලෝකයෙහි මා වරදක් කර නැත. එහෙත් ජී එල් පීරිස්ගේ, ඇපාසිංහගේ හා සමරනායකගේ (ඔහු දැන් ජීවතුන් අතර නැත) ලෝකවල මා වරදක් කර ඇත. එහි වූයේ චින්තන හා සංස්කෘතීන් දෙකක ගැටුමක් හා විශ්වවිද්‍යාල ගුරුවරුන්ගේ පුරාජේරු ආධිපත්‍යය හා ශිෂ්‍යයන්ගේ දුක්ගැනවිල්ලක් අතර වූ ගැටුමකි. පුරාජේරු ආධිපත්‍යයක් මගේ ලෝකයෙහි නැත.

නීතිය ඉදිරියේ මිනිස්සු කිසිසේත් ම සමාන නො වෙති. චූදිතයන්, චෝදකයන් පමණක් නොව නීතිඥයෝ ද විනිසුරුවෝ ද සමාන නො වෙති. ඒ ඒ උසාවිවල ඒ ඒ තීන්දු ලැබෙයි. මුදල් ඇති අයට තමන් වෙනුවෙන් පෙනී සිටීමට දක්‍ෂ නීතිඥයන් ලබාගත හැකි ය. නීතිය විවිධ ආකාරයෙන් විවරණය කිරීමට හැකි ය. එය නීතිඥයාගේ හැකියාව මත ද රඳා පවතියි.

මිනිසුන් සමාන නො වේ නම් සංස්කෘතීන් සමාන වන්නේ කෙසේ ද? ඊනියා බහු සංස්කෘතික සංකල්පය තේරුම් ගන්නේ කෙසේ ද? යම් රටක විවිධ සංස්කෘතීන් ඇති විට ඒ සංස්කෘති සමාන වේ ද? මා මෙහි දී ප්‍රශ්න කරන්නේ එක් සංස්කෘතියක් තවත් සංස්කෘතියකට වඩා උසස් ද නැද්ද යන්න නො වේ. සංස්කෘතීන් උසස් ද නැද්ද යනු මැන ගැනීමට ඇති මිනුම් දණ්ඩ කුමක් ද? එහෙත් රටක ඉතිහාසය, ජීවන රටාව, ඒවාට මුල් වූ සංස්කෘති ආදිය මත පදනම් ව ඒ රටෙහි විශේෂිත වූ සංස්කෘතිය කුමක් දැයි තීරණය කළ හැකි ය. අපේ රටෙහි ඇත්තේ සිංහල බෞද්ධ සංස්කෘතියක්, ඒ මත පදනම් වූ ජීවන රටාවක් හා ඉතිහාසයකි. සිංහල බෞද්ධ සංස්කෘතියට හිමි සුවිශේෂත්වය නැති කරනු ලැබුයේ කවුරුන් විසින් ද? අප ඒ නැවත දිනාගන්නේ කෙසේ ද? බටහිර යුදෙවු ක්‍රිස්තියානි සංස්කෘතිය ලෝකයෙහි ම අධිපතිවාදී සංස්කෘතිය වූයේ කෙසේ ද?

මේ ලිපිය මුහුණු පොතෙන් ද කියවිය හැකි ය.

https://www.facebook.com/Nalin-de-Silva-188511888194878/

නලින් ද සිල්වා

2016 මාර්තු 31   

4 Responses to “මිනිසුන්ගේ සමානකම ඇත්තේ කොහේ ද?”

  1. Senevirath Says:

    ජාතිකත්වය ගැන කතාකල නලින්ද සිල්වාට එරෙහිවූ සියලු විජාතික චින්තකයෝ දැන් මහින්ද වටකරගෙනය . එය මහින්ද චින්තනය විය හැක . ඉන් අපට වැඩක් වෙය්ද

  2. Dham Says:

    I am extremely sorry to learn this Nalin.
    I know late Samranayake who was the head of IT section without doing any IT. Nevertheless he was highly regarded.
    It is good to know the charges but we can suspect those, being against the western aggressor should be the basic reason whatever the charges were.

    What you say is exactly right. What is “the law” in western sense ? It is only a devise to do whatever the government want to do and convince foolish people to think it is the right thing. When you look at those murder cases in USA you will notice it. Victim’s side think the convicted person actually did the killing based on a jury decision. People in the jury use their ears, eyes and brains to decide this without actually knowing it. Sometimes police fabricate evidence, throw away a lot of evidence against and try to convict.
    In Australia, (for many generations ) every student has been told a great Capt. Cook discovered Australia. ( Like Columbus discovered Americas). Now even the current opposition leader accepts it is a පට්ටපල් බොරුවක්. There are discussions to correct this and declare that Australia was invaded and colonised.
    In politics there is no need to prove anything. Voters will give the punishment and it is always the correct decision that time because of the “sample size” ( this is again the western way of evaluation).

  3. Senevirath Says:

    දම් ..මෙන්න චෝදනාව
    ජීඑල් ——–ඇ ය් ඔබ ජාතික චින්තනය උගන්වන්නේ ගණිතය උගන්වලා ඉන්නේ නැතුව ( vc )
    නලින් ——එහෙනම් මට කියන්නේ විජාතික චින්තනය උගන්වන්න කියලද

    නලින් තමන් උගන්වන හැමදෙයක්ම ලංකාවට ගැලපෙනවද නැද්ද යන්න විග්‍රකිරීම ගණය ප්‍රශ්නය ඇතිවුනේ පරයන්ට විෂ වුනේ ඒ කය්

  4. Dham Says:

    Nalin was right. He may have discussed “ජාතික චින්තනය ” with the students, as a father, as a Sinhalaya, as a Baudhdhaya. Is that wrong ? It is wrong to those who are not fathers, not Sinhalas , not Baudhdhayas.

    I too was a teacher of ගණිතය ( to earn some money to help my family while in the Uni)
    BTW there is nothing to “teach” in ගණිතය. The student somehow must learn how to master the way of obtaining a predetermined answer given by the examiner. The teacher can only teach “චින්තනය” ( what I mean here is the way to train oneself the process).

Leave a Reply

You must be logged in to post a comment.

 

 


Copyright © 2018 LankaWeb.com. All Rights Reserved. Powered by Wordpress