සංගදාස අකුරුගොඩ

 ‘ආණ්ඩුක්‍රම ව්‍යවස්ථා නියෝගය කඩාකප්පල් කිරීමේ කුමන්ත්‍රණය’ යන මාතෘකාව යටතේ 2026 ජනවාරි 22 දින ‘ද අයිලන්ඩ්’පුවත් පතෙහි පළ වූ කතුවැකිය, 2022 ජූලි මාසයේදී අරගලයට සහාය දුන් අයට සහ ‘ක්‍රම වෙනසක්’ ඇතුළු විවිධ ධනාත්මක අපේක්ෂාවන් සමඟ වත්මන් පාලනය බලයට ගෙන ඒමට ඡන්දය දුන් අයගේ ඇස් ඇරවීමකි. ( https://island.lk/conspiracy-to-subvert-constitutional-order/ )

විදේශීය රාජ්‍ය තාන්ත්‍රිකයෙකු සහ සුප්‍රකට ශ්‍රී ලාංකිකයින් පිරිසක්, පැහැදිලිවම නීති විරෝධීලෙස ආණ්ඩුක්‍රම ව්‍යවස්ථාව උල්ලංඝනය කරමින් විධායක ජනාධිපති ධුරය භාර ගන්නා ලෙස එවකට කථානායක ධුරය දැරූ මහින්ද යාපා අබේවර්ධන මහතාට බලපෑම් කිරීමට උත්සාහයක් ගත් ආකාරය, එම කතුවැකිය මගින් ප්‍රතික්ෂේප කළ නොහැකි සාක්ෂි සහිතව ඉස්මතු කර දක්වා ඇත. එම සුප්‍රකට ශ්‍රී ලාංකිකයින් පිරිස අතර බෞද්ධ භික්ෂුවක්, කතෝලික පූජකවරුන් කිහිප දෙනෙකු සහ වෘත්තීය සමිති ක්‍රියාකාරිනියක් වූ බවත්, බිය ගැන්වීමේ උපක්‍රමවල අරමුණ ලිබියාවේ ඇති තත්ත්වයට සමාන තත්වයක් ශ්‍රී ලංකාව තුළ නිර්මාණය කිරීම බව කියනු ලැබේ.

අමාත්‍ය කේ.ඩී. ලාල් කාන්ත සහ ඔහුගේ ජනතා විමුක්ති පෙරමුණ පාර්ලිමේන්තුව අල්ලා ගැනීම සඳහා ඊනියා අරගල විරෝධතාකරුවන් මෙහෙයවීමට උත්සාහ කළ නමුත් එය සාර්ථක නොවූ ආකාරය ද කතුවැකියේ සඳහන් විය. දින කිහිපයකට පෙර ‘ලෙනින් කියවමු’ යන මාතෘකාව යටතේ පැවති මහජන රැලියක් අමතමින් අමාත්‍ය ලාල් කාන්ත හෙළි කළේ රුසියානු විප්ලවය අතරතුර ලෙනින් පැවසූ සහ කළ දේ අනුගමනය කිරීම ඔවුන්ගේද සැලසුම් බවයි. අමාත්‍ය ලාල් කාන්ත මෙසේ පැවසීය: අපට රජයේ බලය ලබා ගැනීමට හැකි වුවද, අපට රාජ්‍ය බලය නැත. එබැවින්, අපි දැන් රාජ්‍ය බලය දිනා ගැනීමේ අරගලයේ නිරතව සිටිමු”.

ප්‍රජාතන්ත්‍රවාදී සමාජයක, කිසිදු රාජ්‍ය මැදිහත්වීමකින් තොරව නීතිය හා සාමය පවත්වාගෙන යාම සහතික කිරීමේ අවශ්‍යතාවයක් පවතී. අමාත්‍යවරයාගේ අභිප්‍රාය වනුයේ, රජයේ විරුද්ධවාදීන් මර්දනය කිරීම සඳහා, පොලීසිය, සන්නද්ධ හමුදා සහ අධිකරණය ඇතුළු සියලුම රාජ්‍ය සේවාවන්හි තනතුරු, ජනතා විමුක්ති පෙරමුණේ හිතවතුන්ගෙන් පුරවා, පාලක පක්ෂයේ සෘජු පාලනය යටතට පත් කිරීම බැව් එම ප්‍රකාශයෙන් පැහැදිලි වේ.

නීතිපතිවරයාට එරෙහිව තහවුරු නොකළ චෝදනා එල්ල කරමින් ඔහු ඉවත් කිරීමට ජනතා විමුක්ති පෙරමුණ ප්‍රමුඛ බලවේග උත්සාහ කරමින් සිටී. “අධිකරණ අමාත්‍යාශයේ අතිරේක ලේකම් ලෙස ශ්‍රේෂ්ඨාධිකරණ විනිසුරුවරයෙකු පත් කිරීම විපක්ෂය හෙළා දකී” යන මාතෘකාව යටතේ, ‘ද අයිලන්ඩ්’ පුවත් පතෙහි පලවූ නවතම ප්‍රවෘත්තියකට අනුව, ජනාධිපති අනුර කුමාර දිසානායක අධිකරණ හා ජාතික ඒකාබද්ධතා අමාත්‍යාංශයේ අතිරේක ලේකම් ලෙස ශ්‍රේෂ්ඨාධිකරණ විනිසුරුවරයෙකු පත් කිරීමෙන් අධිකරණය පාලනය කිරීමට උත්සාහ කරන බැව් සඳහන්වේ. (https://island.lk/opposition-slams-sitting-hc-judges-appointment-as-justice-ministry-additional-secretary/)

අනෙක් අතට, පාලක පක්ෂය ඔවුන්ගේ ගජ මිතුරන්ගෙන් කෙනෙකු විගණකාධිපති ලෙස පත් කිරීමට උත්සාහ කරන්නේ, ඔවුන් පාලනය කළ වසර තුළ සිදු කරන ලද සැක සහිත ගනුදෙනු ගණනාවක් වසන් කිරීමට සහ ඊනියා රාජ්‍ය බලය සාක්ෂාත් කර ගැනීම සහතික කිරීමට විය හැකිය.

රටෙහි ජනතාවට, විශේෂයෙන් බොළඳ ලෙස ‘ක්‍රම වෙනසක්’ ගැන සිහින මැවූ අයට, සිදුවෙමින් පවතින වෙනස්කම්වල අවසාන ඉලක්කය සහ අභිප්‍රායන් පිළිබඳ පැහැදිලි අවබෝධයක් නොමැති නම් සහ ඔවුන්ගේම ප්‍රජාතන්ත්‍රවාදී අයිතිවාසිකම් ආරක්ෂා කර ගැනීම සඳහා සුදුසු ක්‍රියාමාර්ග නොගතහොත්, මර්දනකාරී රජයක් යටතේ ජීවත් වීම හැර වෙනත් විකල්පයක් ඔවුන්ට ඉතිරි නොවනු ඇත.

සංගදාස අකුරුගොඩ