දේශාල් පණ්ඩිතගේ විසිනි.

ශ්‍රී ලංකාවේ අපනයන ආදායම් 2014න් පසුව ඇද වැටෙමින් පවතී. 2014 දී ඇමෙරිකානු ඩොලර් බිලියන 11.12ක් වූ අපනයන ආදායම 2016 වන විට ඇමෙරිකානු ඩොලර් බිලියන 10.31 දක්වා 7.3% ක අගයකින් පහත වැටී ඇත . දළ වශයෙන්, අපි 2016 දී තේ වලින් ඇමෙරිකානු ඩොලර් බිලියන 1.20 පමණ උපයාගෙන ඇත . එය මුලු අපනයන ආදායමින් 12% ක පමණ අගයක් ගනී. ඒ අතරින්, අපේ ඉහළම තේ ගැණුම්කරු වනුයේ ඉරානයයි; ඔවුන් 2016 දී ඇමෙරිකානු ඩොලර් මිලියන 154.1 ක තේ මිලදී ගෙන ඇත . දෙවනි විශාලතම තේ ගැනුම්කරු වනුයේ රුසියාවයි; රුසියාව 2016 දී ඇමෙරිකානු ඩොලර් මිලියන 143 ක තේ ශ්‍රී ලංකාවෙන් මිලදී ගෙන ඇත. 2016 දී රුසියාවට තේ අපනයනය කිරීමෙන් ලද ආදායම සමස්ත අපනයන ආදායමින් දළ වශයෙන් 1.4% ක අගයක් ගනී. මෙය සමස්තයක් ලෙස විශාල අගයකි. සමස්තයක් ලෙස අපේ අපනයන බිඳ වැටෙන වෙලාවක , තවත් ආදායම අඩු කරගැනීමට අපට උවමනා නැත .

අපේ තේ රුසියාව ප්‍රතික්ශේප කරන්නේ කුරුමිණියකු නිසාවෙනි; මෙය මීට පෙර කිසිදාක අප මුහුණ නුදුන් තත්ත්වයකි. ඒ නිසා ඇත්ත කුරුමිණීයා ඇත්තේ කොහේදැයි අප හඳුනා ගත යුතුව ඇත . රුසියාව තමන්ට මිතුරු නොවන යුරෝපීය රටවල කෘෂි නිශ්පාදන බොහෝමයක් තහනම් කිරීමට මේ කුරුමිණියා ප්‍රතිපත්තිය පාවිච්චි කර ඇත . ලංකාව වැනි රටකට රුසියාවට කුරුමිණියා දැමීමට පෙළඹීමට හේතුව පැහැදිලි කර ගත යුතුය . ලංකාව ඇමරිකාවේ පදයට නටන්නට පටන් ගන්නේ 2015 දී ය ; මේ කාලය රුසියාව සහ ඇමෙරිකාව අතර ප්‍රතිවිරුද්ධතා උපරිම වන කාලයකි. රුසියානු නිශ්පාදන මිලදී ගැනීම අවම කරන ලෙසට ඇමෙරිකාව සිය රූකඩ රාජ්‍ය වලට අණ දෙන්නේ ඒ කාලයේදී ය . ශ්‍රී ලංකාව 2016 දී රුසියාවෙන් ඇමෙරිකානු ඩොලර් මිලියන 81 ක භාණ් ඩ හෝ සේවාවන් මිළදී ගෙන තිබේ; නමුත් ඉන් බොහොමයක් රටට ඇතුලු වීම නවතා දැමීමට කිසිදු ඉඩක් නැත . නැවැත්විය හැකි එකම දේ නම් ඇස්බස්ටෝස් පමණෙකි.

ශ්‍රී ලංකාව කළාක් මෙන් ම අනෙකුත් රූකඩ රාජ්‍ය ද ඇස්බැටෝස් සහ පිළිකාව යා කරමින් රුසියාවෙන් ඇස්බැටෝස් මිළදී ගැනීම නවත්වන්නට ඇත ; රුසියාව විසින් පැහැදිලිවම තමන් ට සතුරු විදේශ ප්‍රතිපත්තිය ඇති රාජ්‍ය හඳුනා ගන්නට මේ ක්‍රියා කලාපය භාවිතා කරන්නට ඇත .

ඇත්තෙන්ම ලංකාව රුසියාවෙන් 2016 දී මිලදී ගෙන ඇත්තේ ඇමෙරිකානු ඩොලර් 50,000 ක් පමණ වන ඇස්බැස්ටෝස් පමණි; මෙය නැවැත්වීම රුසියානු ආර්ථිකයට දැනෙන්නේවත් නැත ; ඇස්බැස්ටෝස් යනු හුදෙක් රුසියාවෙන් ලංකාව ආනයනය කළ දේ වලින් 0.06% අගයක් පමණි. මේ මෝඩ ප්‍රතිපත්ති තීරණ ඇමෙරිකාවේ පදයට ගන්නා අපේ ආණ්ඩුවට අමතක වූ දෙයක් ඇත ; රුසියාව සමග අපේ වෙළඳ ශේෂය ලංකාවට අතිශ්‍යයින් ම වාසි එකක් බවයි. රුසියවට අපේ අපනයන අගය ඇමෙරිකානු ඩොලර් මිලියන 282ක් වන විට රුසියාව අපට විකුණා ඇත්තේ ඇමෙරිකානු ඩොලර් මිලියන 81ක් භණ් ඩ සහ සේවා පමණි. නමුත් අපේ වැරදි තීරණ නිසා අපි අද ඇමෙරිකානු ඩොලර් මිලියන 143ක තේ වෙළඳපොළ අහිමි කරගෙන ඇත .

රුසියාව මේ ගත් තීරණය අපේ රටේ සමස්ත තේ කර්මාන්තයටම බළපායි. තේ කර්මාන්තයෙන් යැපෙන ලක්‍ෂ ගණනකට ජීවිකාව අහිමි විය හැකිය . මේ කුරුමිණියා හරියට ම ඉන්න තැන සොයා ගත යුත්තේ මේ තත්ත්වය යටතේය . කුරුමිණියා සිටින්නේ යහපාලන අදූරද්‍ර්ශී විදේශ ප්‍රතිපත්තියේ ය ; අන්න ඒ කුරුමිණීයා ඉවත් කරන තුරු මෙවන් දේවල් අපට තව තවත් අසන්නට සහ දකින්නට සිදු වනු ඇත .