රෙජිම් චේන්ජ් සැලසුම සහ ගෝඨාභය…
Posted on August 8th, 2022

හිරන් කුරේ

විමල් වීරවංශ පසුගියදා රූපවාහිනී වැඩසටහනකට එකතු වෙමින් අනාවරණය කළේ, අරගලය හමුවේ ඉල්ලා අස්වීමට සූදානම් වූ ජනාධිපති ගෝඨාභය රාජපක්ෂට එවක අගමැති රනිල් වික්‍රමසිංහ ඉවත් කර ඉල්ලා අස්වන ලෙස ඇමරිකානු තානාපතිනී ජූලි චන්ග් බල කළ බවය.

විමල් ඊට පෙර ප්‍රකාශ කළේ ජනාධිපති ගෝඨාභය අවු. 05 ධූර කාලය නිමාකර සිය දරු මුනුබුරන් සමග ජීවත් වන්නට ඇමරිකාව බලා යාමේ අපේක්ෂාවෙන් ඇමරිකාව අසතුටු නොවන ආකාරයට කටයුතු කළ බවයි. එහෙත් ජනාධිපති ධූරය පමණක් නොව සිය ජීවිතය බරපතළ අවධානමක පවතින අවස්ථාවක ඇමරිකාවේ නැතහොත් ජූලි චන්ග්ගේ උවමනාව අනුව කටයුතු කර ඇමරිකාව අසතුටු නොකර ඉන්නට ගෝඨාභය කටයුතු කර නැති බව විමල්ගේ ඉහත ප්‍රකාශයෙන් සනාථ වෙයි. එපමණක් නොව විමල් එක වැඩසටහනේ කරන ප්‍රකාශයක් ඔහු විසින් අනතුරුව නිෂේධනය කරයි.

අනෙක් අතට විමල් ප්‍රකාශ කරන ආකාරයේ දෙයක් සිදුවී නම් තමන්ට ඇමරිකානු සරණාගතභාවය ලබා දෙන්නේ නම් රනිල් ඉවත් කරන බවට කොන්දේසියක් දමා ගෝඨාභයට ඇමරිකාවට යාමට අවස්ථාවක් ලබා ගැනීමට එහි අවස්ථාවක් තිබිණි. එහෙත් තමා යාමට අපේක්ෂා කළ සියලු රටවල් තමා ප්‍රතික්ෂේප කරන පසුබිමක පවා ගෝඨාභය ජූලි චන්ග්ගේ ඉල්ලීමට පිටුපා ඇත.

කොටින් සිය ද්විත්ව පුරවැසිභාවය අහිමි කරගෙන මේ රටට සේවය කිරීමේ අවංක අභිලාෂයෙන් කටයුතු කළ ගෝඨාභය අවසාන මොහොතේ පවා ඇමරිකානු අපේක්ෂාව අනුව රනිල් ඉවත් කිරීමට කටයුතු කර නැත.

විමල් අනාවරණය කළ මෙම කරුණ මගින් හෙළි වන වඩාත් වැදගත් කාරණය ඇමරිකාව හෝ බටහිර රනිල් තව දුරටත් සිය නියෝජිතයා ලෙස නොසලකන බවය. නොඑසේ නම් රනිල් ඉවත් කර ඉල්ලා අස්වන්නැයි ඇමරිකාව ගෝඨාභයගෙන් ඉල්ලන්නේ නැත. ගෝඨා ඉවත් වූ වහා ජනාධිපති වන්නේ රනිල් බව ඔවුන් නොදැන සිටියා නොවේ.

ඇමරිකානු ඉල්ලීම අනුව රනිල් ඉවත් කළේ නම් එකල අරාජිකව පැවැති රට නැවත යථා තත්ත්වය ගෙන ඒම සිහිනයක් වනු ඇත. කතානායක මහින්ද යාපා ජනාධිපති ධූරයට පත්ව පිස්සු කෙළින අතර රට තුළ සිවිල් යුධ තත්ත්වයක් නිර්මාණය කිරීම ඇමරිකාවේ ඊළඟ සැලසුම වන්නට ඇත.

ඔවුන්ගේ අරමුණ එමගින් අපේ රට අස්ථාවර කිරීම පමණක් නොව එම අර්බුදයට හේතුව චීන ආයෝජන බවට ප්‍රවාදයක් ගොඩනඟමින් චීනයට පහර දීම බව අප අමතක කළ යුතු නැත. එහෙත් ගෝඨාභය නිසා එය වැළකිනි. ඊට හිමි ගෞරවය ඔහුට ලබා දීමට අප කෘතඥ විය යුතුය.

අනතුරුව පැවැති අනුප්‍රාප්තික ජනාධිපතිවරණය සඳහා ඩලස් අලහප්පෙරුම ඉදිරිපත් වූ අතර සුමන්දිරන්, සම්බන්ධන්, මනෝ ගනේෂන්, රවූෆ් හකීම්, රිෂාඩ් බදියුදීන්, තානාපති කාර්යාල, පෙරටුගාමී ඇතුළු අරගල නායකයින්, රාජ්‍ය නොවන සංවිධාන, සජබ ආදී සියලු පාර්ශ්ව ඩලස් දිනවීමට පෙරමුණ ගත්තේය.

ජවිපෙ 2015 මහින්දට දෙන්න එපා කියමින් මෛත්‍රීට කැම්පේන් කළ විදිහට මෙදා රනිල්ට දෙන්න එපා කියමින් ඩලස්ට කැම්පේන් කළේය. රනිල් ඡන්දය දී ගමට එන්න එපා යැයි පෙරටුගාමී මැරයින් වෙනම බියගැන්වීමේ මානසික මෙහෙයුමක් දියත් කළේය.

රනිල් වික්‍රමසිංහ ඉවත් කිරීමට මෙලෙස බටහිර සිය උපරිම බලය යොදන බව දැන දැන විමල් වීරංශ ඩලස් ජනාධිපති කරලීමට දරදිය ඇද්දේය. එය කැලණි වැන්දා සේ සියලු පව් කමා කරවන මහානිශංස පිංකමක් බව පැවසුවේය.

අනුව බලන විට විමල් උත්සාහ කර ඇත්තේ රනිල් පන්නා ඩලස් නම් රූකඩය ජනපති කොට, ඇමරිකාව සිදුකළ රෙජිම් චේන්ග් එක පරිසමාප්ත කරලීමටය. එහි අවසාන කොටස තරණය කිරීමට මුක්කු ගැසීමටය. එය මට නම් සුළුපටු වරදක් නොවේ.

එදා සියලු බලවේග එක මිටට ගොනු වී කළ කුමන්ත්‍රණය පරාජය කිරීමට පොහොට්ටු මන්ත්‍රී පිරිස මහා අවධානමක් ගෙන කටයුතු නොකළේ නම් අද රට සම්පූර්ණයෙන් මෙහෙය වන්නේ බටහිර විසින් තෝරාපත් කළ ඩලස් විසිනි.

එසේ නම් අපේ රට සියලු බටහිර අවශ්‍යතා ඉටුකරගන්නා ගොදුරු බිම් බවට පත්වනු නොඅනුමානය. විමල් දැන හෝ නොදැන අවස්ථාවේ ඉටු කළේ ඇමරිකානු අවශ්‍යතාව හැර වෙන යමක් දැයි ඔහුගේ මෙම ප්‍රකාශ දෙක ඇසුරින් නුවණින් විමසා බැලීම වටී.

Sent from my iPhone

Leave a Reply

You must be logged in to post a comment.

 

 


Copyright © 2024 LankaWeb.com. All Rights Reserved. Powered by Wordpress