ආචාර්ය සරත් ඔබේසේකර

කටාර් රාජ්‍යය අද ලෝකයේ සාර්ථකම බලශක්ති ආර්ථිකයන්ගෙන් එකක් බවට පත්ව ඇත්තේ ස්වාභාවික වායු (LNG) අපනයනය පමණක් නොව, ඒ වටා ගොඩනැගූ සමස්ත කර්මාන්ත පරිසර පද්ධතිය (Industrial Ecosystem) හේතුවෙනි.

විශේෂයෙන් රස් ලෆ්ෆාන් කර්මාන්ත නගරය (Ras Laffan Industrial City) සහ North Field ව්‍යාපෘති ආශ්‍රිතව, කටාර් රජය ලොව ප්‍රමුඛ ඉංජිනේරු සමාගම්, තාක්ෂණික ආයතන, EPC කොන්ත්‍රාත්කරුවන්, පර්යේෂණ ආයතන, පුහුණු මධ්‍යස්ථාන, මූල්‍ය ආයතන සහ වෘත්තීය සේවා සපයන්නන් එකම පරිසරයකට ආකර්ෂණය කිරීමට සමත් වී ඇත.

කටාර් ආදර්ශයේ ප්‍රධාන ලක්ෂණ

1. රස් ලෆ්ෆාන් කර්මාන්ත නගරය

මෙය ලෝකයේ විශාලතම LNG කර්මාන්ත සංකීර්ණයන්ගෙන් එකකි.

එහි LNG ද්‍රවීකරණ කම්හල්, පෙට්‍රෝරසායන කර්මාන්ත, ඝනීභවිත වායු සැකසුම් මධ්‍යස්ථාන, මුහුදු සේවා මධ්‍යස්ථාන සහ නාවික පර්යන්ත පිහිටා ඇත.

දහස් ගණනක් ඉංජිනේරුවන්, තාක්ෂණවේදීන් සහ විශේෂඥ සේවකයන් මෙහි සේවය කරති.

2. ගෝලීය සමාගම්වල කලාපීය මූලස්ථාන

කටාර් වෙත පහත සඳහන් ලෝක ප්‍රකට සමාගම් තම කලාපීය මූලස්ථාන ස්ථාපිත කර ඇත.

• Shell
• ExxonMobil
• TotalEnergies
• ConocoPhillips
• Baker Hughes
• SLB (Schlumberger)
• Halliburton
• Technip Energies
• Chiyoda
• McDermott
• GE Vernova

මෙම සමාගම් සිදු කරන්නේ නිර්මාණ ඉංජිනේරු සේවා, EPCM, ව්‍යාපෘති කළමනාකරණය, මිලදී ගැනීම්, ඩිජිටල් ඉංජිනේරු සේවා, නඩත්තු කටයුතු, කැණීම් සහ උපදේශන සේවාය.

3. දැවැන්ත EPC ව්‍යාපෘති ( EPC යනු Engineering, Procurement and Construction යන්නයි.) 

Bul Hanine Offshore Redevelopment Project ව්‍යාපෘතිය පමණක් ඇමරිකානු ඩොලර් බිලියන 4කට ආසන්න වටිනාකමකින් යුක්තය.

එයට ඇතුළත් වන්නේ,

• මුහුදු වේදිකා 60කට අධික සංඛ්‍යාවක්
• මුහුදු පතුලේ නල මාර්ග සහ කේබල් 40කට අධික සංඛ්‍යාවක්
• පවතින වේදිකා නවීකරණය
• පැරණි ව්‍යුහ ඉවත් කිරීම

මෙවැනි ව්‍යාපෘති දහස් ගණනක් උසස් වැටුප් සහිත රැකියා සහ බිලියන ගණනක විදේශ විනිමය උපයා දෙයි.

4. North Field Expansion

ලෝකයේ විශාලතම LNG පුළුල් කිරීමේ ව්‍යාපෘතියක් වන මෙය EPC, ඉංජිනේරු, නිෂ්පාදන, සැපයුම්, නාවික සේවා සහ උපදේශන ක්ෂේත්‍රවලට විශාල ආදායමක් ලබා දී ඇත.

ශ්‍රී ලංකාවට ඉගෙන ගත යුතු පාඩම

අද කොළඹ පෝට් සිටිය ප්‍රවර්ධනය කරන විට වැඩි අවධානයක් යොමු වන්නේ සුඛෝපභෝගී මහල් නිවාස, හෝටල්, ජාත්‍යන්තර පාසල්, රෝහල් සහ වාණිජ ගොඩනැගිලි සඳහාය.

එහෙත්, සැබෑ දිගුකාලීන විදේශ විනිමය උපයා දිය හැක්කේ දැනුම මත පදනම් වූ සේවා අපනයනයෙනි.

එබැවින් පෝට් සිටිය පහත ක්ෂේත්‍ර සඳහා කලාපීය මධ්‍යස්ථානයක් (Centre of Excellence) බවට පත් කළ යුතුය.

• Offshore Engineering
• EPCM සේවා
• තෙල් හා ගෑස් උපදේශන
• Marine Surveying සහ Classification
• Digital Engineering සහ AI
• Procurement හා Logistics
• ජාත්‍යන්තර බේරුම්කරණ (Arbitration)
• නීති සේවා
• Marine Insurance
• Offshore Renewable Energy
• වෘත්තීය පුහුණුව සහ සහතික කිරීම

මෙම කර්මාන්ත සඳහා විශාල ඉඩම් අවශ්‍ය නොවන අතර ඉහළ වටිනාකමකින් යුත් සේවා අපනයනය කිරීමෙන් විදේශ විනිමය විශාල ලෙස උපයා ගත හැකිය.

කොළඹට ඇති සුවිශේෂී වාසිය

ශ්‍රී ලංකාව මැදපෙරදිග, ඉන්දියාව, බංග්ලාදේශය, දකුණු ආසියාව සහ නැගෙනහිර අප්‍රිකාව සම්බන්ධ කරන ඉතාමත් වැදගත් මුහුදු මාර්ගයේ පිහිටා ඇත.

නිසි බදු ප්‍රතිපත්තියක්, ආයෝජක හිතකාමී නීති පද්ධතියක්, විදේශීය විශේෂඥයන්ට පහසු රැකියා ප්‍රතිපත්තියක් සහ සැබෑ බලතල සහිත One-Stop Investment Approval System එකක් ස්ථාපිත කළහොත්, කටාර්, එක්සත් අරාබි එමීර් රාජ්‍යය, ඕමානය, ඉන්දියාව සහ අනෙකුත් කලාපීය රටවල ව්‍යාපෘති සඳහා සේවා සපයන ගෝලීය සමාගම්වල කලාපීය මූලස්ථාන කොළඹට ආකර්ෂණය කර ගත හැකිය.

අවසාන අදහස ( නිගමනය)

පෝට් සිටිය හුදෙක් සුඛෝපභෝගී මහල් නිවාස අලෙවි කිරීමේ ව්‍යාපෘතියක් නොවිය යුතුය.

එය ඉන්දියානු සාගර කලාපයේ ඉංජිනේරු, නාවික හා බලශක්ති සේවා මධ්‍යස්ථානය බවට පත් කළහොත්, ශ්‍රී ලංකාවට දශක ගණනාවක් පුරා ස්ථාවර විදේශ විනිමය ආදායමක්, උසස් වැටුප් සහිත රැකියා සහ නව තාක්ෂණික දැනුම ලබා ගත හැකිය.

අද කටාර් අනුගමනය කළ ආදර්ශය, හෙට ශ්‍රී ලංකාවේ ආර්ථික පරිවර්තනයට මඟ පෙන්වන ආදර්ශයක් විය හැකිය. එම අවස්ථාව අප අහිමි නොකළ යුතුය.

ආචාර්ය සරත් ඔබේසේකර
හිටපු ප්‍රධාන විධායක නිලධාරී – කොළඹ ඩොක්යාර්ඩ් පීඑල්සී
හිටපු ප්‍රවර්ධන කළමනාකාර අධ්‍යක්ෂ – වෝකර්ස් කොළඹ නැව් තටාකාංගනය
සභාපති – සමුද්‍රීය හා අක්වෙරළ කර්මාන්ත උපදේශක