උපුටාගැණීම අද දෙරණ

පොහොර අර්බුදය මධ්‍යයේ වුවද පොළොන්නරුව පරාක්‍රම සමුද්‍රය සහ මින්නේරිය ගොවි ව්‍යාපාරවල වගා කටයුතු සාමාන්‍ය පරිදි සිදුකෙරෙන බව “අද දෙරණ” එහි කළ සංචාරයේදී අනාවරණ විය.

එහෙත් මෙවර අපේක්ෂිත අස්වැන්න නොලැබෙන බවත් එළඹෙන කන්නයේදී රසායනික පොහොර නොලැබුණහොත් තමන් කුඹුරු වගා නොකරන බවත්  එම ගොවීන් පවසයි.

පොළොන්නරුව දිස්ත්‍රික්කයේ මෙම කන්නයට පෙර සාමාන්‍ය කන්නයකදී වගාකරන ලද ගොවිබිම් ප්‍රමාණය හෙක්ටයාර 70,000 කට ආසන්නය.

එහිදී එක් හෙක්ටයාරයකින් වී මෙට්‍රික් ටොන් 5 බැගින් එක් කන්නයකදී ලබාගෙන ඇති මුළු අස්වැන්න වී මෙට්‍රික් ටොන් තුන්ලක්ෂ පනස්දහසක් පමණ වේ.

මෙවර මහ කන්නය ආරම්භයේ ඇතිවූ පොහොර අර්බුදයත් සමඟින් ගොවින් ගොවිතැන්වලට පිවිසීම අඩුවූයේ යැයි බොහෝ දෙනා පැවසුවද, මෙවර මහ කන්නයේද පොළොන්නරුවේ ගොවීන් හෙක්ටයාර 69,158ක ප්‍රමාණයක් අස්වද්දා ඇති බව වාර්තා වේ.

පොළොන්නරුව දිස්ත්‍රික්කයේ ප්‍රධාන ගොවි ව්‍යාපාරය වන පරාක්‍රම සමුද්‍රය ගොවි ව්‍යාපාරය ඔස්සේ එක් කන්නයකදී වගා කෙරෙන හෙක්ටයාර ප්‍රමාණය 10,365කි.

ඒ මගින් මෙට්‍රික් ටොන් 51,825 ක අස්වැන්නක් එක් කන්නයකදී මෙරට වී නිෂ්පාදනයට එක්වේ.

පෙර කන්නවලදී මෙන්ම මෙවරද ගොවීන් මුළු හෙක්ටයාර දස දහසක ප්‍රමාණයම වගා කර තිබුණද පොහොර ගැටලුව හේතුවෙන් සාර්ථක අස්වැන්නක් ලබාගත නොහැකි වන බව ගොවි සංවිධාන නායකයින් පවසනයි.

පොළොන්නරුව මින්නේරිය ගොවි ව්‍යාපාරයේ එක් කන්නයකදී හෙක්ටයාර 8,400ක පමණ ගොවිබිම් ප්‍රමාණයක් අස්වද්දන අතර ඒ තුළින් කන්නයකදී ආසන්න වශයෙන් මෙට්‍රික් ටොන් 42,000ක පමණ වී ප්‍රමාණයක් මෙරට සමස්ත වී නිෂ්පාදනයට එක්කරයි.

ඒ අනුව මින්නේරිය ගොවිජන ව්‍යාපාරයේද මෙවර පෙර කන්නවලදී මෙන් ගොවීන් සිය කුඹුරු අස්වද්දා තිබුණද පොහොර ගැටලුව හේතුවෙන් සාර්ථක අස්වැන්නක් පිළිබඳ බලාපොරොත්තු බිඳවැටී තිබේ.